- மாமல்லபுரம்: மாமல்லபுரத்தில் நடைபெற உள்ள இந்திய நாட்டிய விழா முன்னிட்டு, விழா நடைபெறும் பகுதிகளில் இயங்கி வரும் தள்ளுவண்டி கடைகளைத் தற்காலிகமாக மாற்று இடங்களில் அமைத்துக்கொள்ள வருவாய் துறை அதிகாரிகள் வற்புறுத்தி வருவதாக வியாபாரிகள் குற்றம்சாட்டியுள்ளனர்.
- விழா காலத்தில் உள்நாடு மற்றும் வெளிநாடுகளில் இருந்து பெருந்திரளான சுற்றுலா பயணிகள் வருகை தர உள்ள நிலையில், பாதுகாப்பு, போக்குவரத்து ஒழுங்கு மற்றும் விழா ஏற்பாடுகள் காரணமாக இந்த நடவடிக்கை எடுக்கப்படுவதாக அதிகாரிகள் தெரிவித்துள்ளனர்.
- ஆனால், பல ஆண்டுகளாக அதே இடத்தில் தொழில் செய்து வரும் தள்ளுவண்டி வியாபாரிகள், மாற்று இடங்கள் மக்கள் நடமாட்டம் குறைவான பகுதிகளில் உள்ளதால் வருமானம் பாதிக்கப்படும் என வேதனை தெரிவித்துள்ளனர்.
- மேலும், முன்னறிவிப்பு இன்றி இடமாற்றம் செய்ய அறிவுறுத்தப்பட்டதாகவும் அவர்கள் கூறினர்.
- இதனால், விழா ஒழுங்கும், வியாபாரிகளின் வாழ்வாதாரமும் பாதிக்காத வகையில், நிரந்தர தீர்வு காண வேண்டும் என சமூக ஆர்வலர்கள் கோரிக்கை விடுத்துள்ளனர்.