அரசு ஊழியர்களுக்கு பழைய ஓய்வூதியமா?

முதல்வர் அறிவிப்பு

சென்னை:
அரசுப் பணியாளர்கள் மற்றும் ஆசிரியர்களுக்கு பழைய ஓய்வூதியத் திட்டம் தொடர்பாக முதல்வர் மு.க. ஸ்டாலின் முக்கிய அறிவிப்பை வெளியிட்டுள்ளார். அரசுப் பணியாளர்களின் நீண்டகால கோரிக்கைகளை கருத்தில் கொண்டு இந்த விவகாரம் குறித்து அரசு தீவிரமாக பரிசீலித்து வருவதாக அவர் தெரிவித்துள்ளார்.

2021 ஆம் ஆண்டு சட்டமன்றத் தேர்தல் அறிக்கையில் அளிக்கப்பட்ட வாக்குறுதிகள் படிப்படியாக நிறைவேற்றப்பட்டு வருவதாக குறிப்பிட்ட முதல்வர், ஓய்வூதியத் திட்டம் தொடர்பாக சட்ட, நிதி மற்றும் நிர்வாக ரீதியான அம்சங்கள் விரிவாக ஆய்வு செய்யப்பட்டு வருவதாக தெரிவித்தார். அரசு ஊழியர்களின் நலன் எந்த வகையிலும் பாதிக்கப்படாத வகையில் முடிவுகள் எடுக்கப்படும் என்றும் அவர் கூறினார்.

அரசுப் பணியாளர்கள் மற்றும் ஆசிரியர்கள் முன்வைக்கும் கோரிக்கைகள் குறித்து பல்வேறு தரப்பினருடன் ஆலோசனைகள் மேற்கொள்ளப்பட்டு வருவதாகவும், இதற்காக அமைக்கப்பட்ட குழு தனது பரிந்துரைகளை அரசிடம் சமர்ப்பித்துள்ளதாகவும் முதல்வர் தெரிவித்தார். அந்த அறிக்கையின் அடிப்படையில் அடுத்தகட்ட நடவடிக்கைகள் எடுக்கப்படும் எனவும் கூறினார்.

புதிய ஓய்வூதியத் திட்டத்தில் உள்ள குறைபாடுகளை களைந்து, ஓய்வுக்கால பாதுகாப்பை உறுதி செய்யும் வகையில் தேவையான சீர்திருத்தங்கள் மேற்கொள்ளப்படும் என உறுதியளித்த முதல்வர், அரசு ஊழியர்களின் எதிர்காலம் பாதுகாக்கப்படும் என்றார். இந்த அறிவிப்பு அரசு ஊழியர்கள் மற்றும் ஆசிரியர்கள் மத்தியில் பெரும் எதிர்பார்ப்பை ஏற்படுத்தியுள்ளது.